حتى انت يا جرحي؟!! غدرت وتشافيت ؟!
هانت عليك العشره اللي اجمعتنا؟!!
قلّي : وش اللي شفت من بعد ما اقفيت؟! ؟!
وبا قول لك هو ليه حنّا افترقنا
قصرت في حقك ؟! خذلتك؟! تخليت ؟!
طيب!! تبي ترحل وتترك وطنا؟!
كنت الوحيد اللي بقـــى لي مــن البيت
اللي جمعنا بالفرح واحتضنا
انته.. وانا..والحلم..واحساسه الميْت
وآمال كانت يوم كنا.. وكنا
صحيح بأول مولـــدك كـــم تمنيت
اذبحْك...لكني ولفتك...وعشنا
والدمع في عيني وانا بعد غنيت
الين غضنا جْروح يوم اسمعتنا
كم عيد يا جرحي بصدري تناغيت ؟!
عيدت من غيرك ؟!ودوم اتمنا !!
كل عيد اجدد ثوبك ولو تأذيت
واسكب لك دموعي لجل مـ اتحنا
والاعبك..واضحك معك..كلما جيت
تركض ما بين العوج ..منا...ومنا
يا ليت تدري كم بصدري من الـ ليت!!
ويا ليت لو به "ليت" تفهم وجعنا
بذمتك قليّ اذا يوم حنيت
وللحين تذكر كم بكينا وضحكنا؟!
وقلّي: وش اللي شفت يومك تشافيت ؟!
وقلي بعد: هو ليه حنا افترقنا ؟!
No comments:
Post a Comment